Selamat Natal Tamang

Selamat Natal Tamang....

Desember so tiba

Pohon terang, kelap-kelip lampu dan hiasan natal ada di mana-mana

Lagu-lagu Natal mulai ja kase menyanyi dimana-mana

Orang-orang so mulai sibuk dengan beking ibadah pra-natal

kukis-kukis Natal so ja mulai beking di setiap rumah

Semua ini dabeking for merayakan kelahiran torang punya Juru Selamat

Masih ta inga tahun-tahun lalu

Torang masih boleh merayakan pra-natal sama-sama

Ba hias pohon natal, badekor, biar musti ba ujan deng tidor di Gereja

Torang le latihan drama sama-sama, makang-makang kukis, sampe ba foto dengan gaya orang narsis...

samua itu torang lalui sama-sama dengan keceriaan, ba tatawa, baku-baku sedu sampe lante....

Kalo pas Natal torang bole ba pasiar dimana-mana

So pake baju baru tu da beli deng tamang-tamang

Ba pasiar dari ujung tarkuran sampe ujung sendangan Pinaras

Pasang petasan sama dengan anak-anak kecil

hahahahahahaha

Pra-Natal dengan Natal skarang suasana jadi berbeda

Sonda ada torang pe tamang bae yang tong sayang

Sonda ada yang babaku sedu, baba antar, baba bantu pa torang

Cuma....

Torang yakin ngana ada tenang di Sorga sana 

Ngana mungkin ba tanya, bagimana kang Natal kali ini di Pinaras?

Torang mo bilang: torang tetap mo baku dapa ulang di Sorga, jadi nanti torang kase cerita di sana jo nhe...

Dari sini torang mo bilang Juru Selamat so lahir untuk menyelamatkan torang semua

Yesus Juru Selamat mengasihi torang semua

SELAMAT NATAL TAMANG!

(Mengenang kembalinya di Sorga sahabat-sahabat kita Pnt.Tian & Nover)